一直以嚟 做唔做CPR都野嚟好大爭議。主要原因係 決定做唔做CPR嘅 好多時候都係病人嘅家屬。病人嘅意願未必同病人家屬嘅意願一樣。
有家屬贊成要做CPR嘅，主要原因係希望醫護人員可以盡最大嘅努力去拯救病人。感覺如果盡咗最大努力都救唔番病人嘅話，都算對得住病人；如果盡咗最大努力救得番，對家屬嚟講仲好添，因為可以同病人相處多一陣，始終家屬都會唔捨得親人離世，係可以諒解的。
但係，你要知道香港係冇得安樂死。而大多數病人要在醫院進行CPR中可能係有end stage cancer/chronic disease/loss of conscious,即係佢地本身有病都會覺得好辛苦/痛/好攰/唔舒服，加上喺醫院 雖然有醫護人員提供照顧，但係要你24小時訓喺床上面，電視又睇唔到，電話又用唔到嘅情況下，相信你同我都未必頂得順。更何況，病人通常唔止訓24小時咁簡單…有啲病人更加野都冇得自己食、野又講唔到…
所以如果你代入病人身份去睇，真係會覺得好悶同好辛苦。如果我係果啲病人，我係寧願比我安安詳詳咁去世好過🙈
當然，有啲家屬都係唔明，咁同做唔做CPR有咩關係，救到咪救，救唔到咪算，還掂病人停咗心跳嘅時候，都未必會feel到痛果啲野。
但係最大嘅問題係如果救得番，病人會經歷更多嘅痛苦，本身嘅病唔會因為CPR完而冇咗，疾病導致嘅痛苦仍然會跟住病人;另外CPR完，病人好大機會啲肋骨會斷，即係要承受另一種痛， 同埋CPR完，會駁住部呼吸機，喉嚨會因為插住條喉而痛，而且on咗呼吸機，好多時要打啲藥 會令到病人好眼訓/攰。
個人認為有啲似extension of suffering多啲。
咁又唔係話所有病人都唔值得進行急救嘅，個人覺得 如果係年輕嘅人/突然喺街暈低果啲人都值得急救嘅，因為 果啲人急救之後可能都有機會復原。
不過當然，作為醫護人員，我地一定會尊重病人同家屬嘅意願嘅~ 選擇CPR 或者 DNACPR 都係冇話絕對啱或錯嘅~ #最緊要家人安心😀
#以上純屬個人意見
#歡迎理性討論
-------------------------------------------------------
註釋:
CPR (Cardiopulmonary resuscitation) 即係心肺復甦，簡單嚟講即係急救。
DNACPR (Do not attempt CPR) 意思係指當病人心肺停頓時，不進行急救; 但在世時唔代表會停曬啲藥，會繼續provide palliative care, 即係務求令到病人可以有最好嘅Quality of life/care。
Search